الحياه الجامعيه والشبح اللى بعد التخرج

الحياه الجامعيه والشبح اللى بعد التخرج

What about after Graduation?!!

سؤال مهم.. 

الطلاب انوااااع كتيييير .. وكل واحد بيختلف المفهوم معاه عن الحياه دى حسب نوعه .. بس انا ف البوست ده هركز على المجمل الحاجات اللى لازم نوعى لها اللى لازم ناخد بالنا منها ونوعى غيرنا بيها..

البوست الشامل عن الكليات واللى محتاج تعمله فى اولى وتانيه وتالته ورابعه وكمان ما بعد التخرج ان شاء الله.. ف مبدايا كده تعال نعمل كام حاجه مهمين قبل ما نكمل قرايه البوست..

▬▬▬▬▬▬▬▬▬▬▬▬

تعمل Save للبوست بعد متقراه عشان هتحتاجه دايما وتحتاج ترجع له وكمان تمنشن و share مع كل صحابك سواء كان لسه طالب او كان Fresh Graduate تعرفه بالبوست.. ويفضل انك لو تعرف تمنشن لهم بحيث يشووفوا البوست دلوقتى حالا ويقرأوه معاك يكون افضل عشان البوست يوصل للجميع فى وقت كويس.. وحاجه كمان اوعى تعمل Save لها وتقول هقرأها بعدين لا لازم تقرأها دلوقتى عشان هتغير حاجات كتير فى تفكيرك ومفاهيمك عن الكليه...

● تعال كده فى الاول ناخد (اولى وتانيه وتالته كليه) مع بعض عشان التلاته زى بعض وبتبقا دماغنا لسه متسستمه على فكرة ان الحياه (بمبى و وردى) مش (رصاصى او كحلى).. 😅

●●● كام حاجه كده لازم تاخد بالك منهم فى الكلية فى اول تلات سنين لك:

1- اول حاجه هتقابلها فى الكليه هما النصابين او صيادين طلاب سنه اولى .. ودول اما انه يوزع عليك فلاير (ورقة دعايا لحاجه معينه) كورس معتمد (اى هبد) شرح لماده معينه ف القسم بتاعك .. ويقولك انك ف النهايه هتاخد الامتحان او شهاده معتمده والكلام البطيخ ده.. ف ركز اوى عشان اولا مفيش حاجه اسمها كورس معتمد من اكاديمية مش عارف ايه للتعليم والتطوير والكلام البطيخ ده.. كل دول ناس نصابين عايزين يعملوا سبوبه من طلاب اولى الغلابه عشان مش فاهمين اى حاجه ف الكليه

2- تانى حاجه انسا خالص انك وانت ماشى ف الكليه تخبط فى واحده زميلتك وتنزلوا تلموا الكتب  (انت بتقول ايه) بصوت محمد رمضان .. الكلام طبعا مش للازهريه زيى .. لا ده كلام ل حبايبنا بتوع اولى كلية الجامعات العامه مفيش الكلام ده اطمن 

3- متسيبش حد يضحك عليك ويضيع وقتك .. فى اول سنه لك فى الكليه هتلاقى ناس كتير عايزه تتعرف عليك لان لسه لحد دلوقتى مفيش المفهوم الصحيح ل (صحاب الكليه) .. ف متسيبش حد يشتغلك ويستغلك من الناس الل هتقابلهم فى اولى كليه عشان بجد هتغير وجهة نظرك عن مفهوم صحاب الكليه مع دخولك للترم التانى .. مش لسنه تانيه لا من الترم التانى هتبدأ تحدد صحابك اللى بجد فعلا

4- اوعى اوعى اوعى تروح سنتر وتاخد كورس لماده عندك فى الكليه .. كله نصب ويقولوا لك اللى بيشرح ده عارف امتحانات الدكاتره .. اصلا الدكتور لو متغيرش ف تلقائى تروح من نفسك تبص على الامتحانات بتاعته قبل امتحانك عشان تحدد بيكرر ولا لا امتحاناته .. ف انسى خالص اعتمادك على غيرك فى المذاكره .. الكليه انت بس اللى تعرف تذاكر .. او تشرح لواحد صحبك وهو يشرح لك بس طبعا ده بعد ما تذاكر لوحدك

5- ال Student activity دى بقا هتلازمنا من دلوقتى لحد ما نشرح السنين كلها بتاعة الكليه وكمان بعد التخرج بتفيد.. الانشطه الطلابيه او التطوع ده مهم خصوصا ف الكليات اللى زي حالاتنا اللى اساس الشغل عندهم بيعتمد على المهارات اكتر ما بيعتمد على الشهاده.. ف اتطوع فى تيمات تطوعيه وحسن مهاراتك المختلفه ما بين (تواصل ل برزيتيشن ل تفاوض واقناع...وغيرهم كتير عن مهارات السوفت اسكيلز دى) ولو عايزين بوست مفصل عن المهارت دى نبقا ننزل بوست تانى مفصل عنها ان شاء الله...

▬▬▬▬▬▬▬▬▬▬▬▬

6- التدريب الصيفى بعد ما تخلص كل سنه سواء اولى او تانيه او تالته .. كل السنين اللى متاح لك فيها تاخد تدريب صيفى خد ومتتاخرش فى شركه فى مصنع فى معمل فى صيدليه .. ولو انت حقوق مثلا فى مكتب محامى تعرفه .. وكله حسب تخصصك ومجالك .. انزل تدريب صيفى عشان هيفرق معاك كتير انك هتختلط بسوق العمل وهتفهم اكتر السوق ماشى ازاى...

7- السيره الذاتيه بتاعتك .. لازم تتعلم تكتب ال Cv بتاعك من وانت لسه فى اولى ثم تانيه ثم تالته .. لو مجهزتش ال Cv بتاعك خلال الفترات دى صدقنى هتضيع وقت كتيررر اوى وانت فى البكالريوس عشان تفهم اصلا السيره الذاتيه بتتكتب ازاى وبالنسبه للسى فى ف هو هيفيدك فى وقت ما يتعمل Job fair عندك ف الكليه والشركات تكون بتعرض فرص تدريب فى اماكن مختلفه شركات مصانع بنوك مكاتب محاماه .. 

8- نيجى بقا لاهم حاجه المؤتمرات والايفنتات وال job fairs و الوارك شوبز

لازم نفهم حاجه مهمه اوى فى الحاجات دى .. انهم ملهمش علاقه خاااالص بسوق العمل الا اذا انت فى علوم و روحت تحضر ايفنت او وارك شوب او حاجه مثلا عن مجال ال Medical rep او وارك شوب عن مهاره من السوفت اسكيلز (روح ابحث عن الكلمه وهتفهم اكتر) فى الحاله دى بس هتستفيد بس مش الاستفاده اللى انت متخيلها انت هتاخد هوامش عن الحاجه اللى هتتذكر مهما كان الكلام اللى هيتقال بس هيكون مجرد هوامش مش هيبقا تعمق فى المجال .. ف عشان تكون على نور انت تروح تحضر فى الاماكن دى عاااادى اوى اوى بس متعتمدش عليها كليا ومتحطهاش هى الحياه او الموت عندك يعنى لو صادف ان يوم ايفنت مهم مثلا (انت متخيله مهم) كان عندك كويز وانت من النوع الاجتماعى والكلام ده .. سيبك من الايفنت خالص ومتروحهوش وروح الكويز بتاعك طبعا عشان اى ايفنت مهما كان تقيل وجميل ف هيتكرر كده كده عادى وممكن تاخد الحاجات اللى ف الايفنت دى كلها من عمك Google والله و خالك Youtube الدنيا بسيطه مش هتقف على الايفنت او الوارك شوب او الجوب فير .. كل الامور دى هتفيدك جدا فى تطوير مهاراتك بس حط اولويه الاول للجزء الاكاديمى حتى لو مكنش هو اساس الشغل بتاعك لكن برضه تديله اولويه لانه فى الفتره دى هو الاهم.. احضر محاضرات " فريق معا " واعرف الناس دى بتبيع ايه ولا بتعمل ايه لانهم هيفرقوا معاك فى مستقبلك 180 درجة.. دول فريق هدفه انه يعلم الشباب عن سوق العمل ويفهمهم اكتر محتاجين ايه عشان يتاهلوا له..

▬▬▬▬▬▬▬▬▬▬▬▬

9- ال Moocs او زى ما بنسميها منصات التعليم الاونلاين .. اى مهاره انت محتاجها فى حياتك ادخل بس على جوجل واكتب مهارة كذا كذا منصة كذا .. هتلاقى كورسات كتيررررر اوى اوى اونلاين ومجانيه بتقدم المهاره دى .. خدها من الاونلاين وانزل طبقها فى ارض الواقع .. متسيبهاش لان من الحاجات اللى انا اتعلمتها طول فترة الكليه ان اى حاجه باخدها ومش بمارسها بتروح من دماغى بعد ما باخدها على طول.. ف اهم حاجه التطبيق على اى حاجه تاخدها.. وفى الكومنت بتاعى ع البوست هتلاقى لينكات منصات كتير محترمه

▬▬▬▬▬▬▬▬▬▬▬▬

10- الشهادات المعتمده من (المكان الفلانى الجامد زوحليقه) .. مفيش حاجه من منظمه تحت بير سلم اسمها معتمده .. شهاداتك من التيمات التطوعيه مسمهاش شهاده معتمده .. شهاداتك من الكورسات مسمهاش شهاده معتمده .. شهاداتك من ايفنت مسمهاش شهاده معتمده .. الشهاده المعتمده هى الشهاده اللى تاخدها من مكان موثق تابع لهيئة حكوميه ومؤثقه بختم النسر او تابع لهيئة دوليه زى السفاره الامريكيه او غيرها من الاماكن دى.. يكون معترف بيها فى منظمه خلافا عن كده اسمه (نصب على الطلاب) 

▬▬▬▬▬▬▬▬▬▬▬▬

11- الانجلش بقا واهم حاجه فى الفتره دى هو الانجلش 

عايز افرحك ب حاجه مهمه اوى اوى ف الانجلش وانك ممكن تتعلمه ب ارتياح تاااام من غير ما تدفع فيه ولا مليم والله وكمان مش اونلاين ده اوفلاين وبجد الكلام وعن تجربه شخصيه منى .. السفاره الامريكيه كل يوم أربع السفارة بتعمل محادثات مع ناس أمريكيين عن مواضيع مختلفة وأي حد يقدر يحضرها ببلاش بس بشرطين هنقولهم ف الآخر.

ف الأيام العادية تقدر تروح وتعمل محادثة برضو مع ناس مصريين بس هتلاقي فيهم ناس تقيله فى العادى .. 

 مكان السفاره : 5 شارع توفيق دياب، جاردن سيتي، القاهرة. اقرب محطة مترو هي السادات وتسال اى حد قوله عاوز اروح السفارأنزل وقول عايز اروح السفارة الأمريكية، هتمشي شوية صغيرين هتدخل من ناحية الكورنيش.. وممكن نبقا نعمل بوست مفصل عن الانجلش اذا فيه حد حابب فعلا يفهم اكتر عنه.. او بوست عن السفاره الامريكيه والاستفاده منها ايه

● عايز تزود نفسك اكتر فى الانجلش نزل ابلكيشن Duolingo على موبايلك واتعلم مع نفسك ف البيت .. فيه ناس مش بينفع معاهم التعليم ف البيت مع نفسه ف ده بقا سيب لى كومنت فى البوست عشان نفهم اكتر هنتعلم ازاى صح..

وطبعا ده مش معناه ان الاماكن اللى بتعلم انجلش نصابين (الاماكن دى بتختلف عن النصابين اللى بيقدموا كورسات فى اى حاجه تحت مسمى توعية الشباب)

12- اخر حاجه بقا ابقا شوف الكومنت الاول فى البوست فيه لينكات مهمه اوى 

●●● نيجى بقا للحلوين بتوع رابعه اللى انا منهم والخريجين كمان:

مبدايا اللى هقوله ده كله برضه راى شخصي يحتمل الخطأ والصواب ف زى ما تحبوا لكن اللى قولته واللى لسه هقوله هو ده اللى انا بعمله..

الاول لازم نعرف ان فيه عقليتين للناس اللى فى رابعه واللى اتخرجوا خلاص .. ف لازم تحدد انت عقليتك مين فيهم

الاول العقليه اللى عايزه تكمل دراسات عليا وماجستير ودبلومات خاصه بمجالك ولا اكتفيت بالكليه وعايز تشتغل فى المجالات اللى هى متاحاها لك ك علوم مثلا وعايز تشتغل فى الميديكل ريب.. ولا مجال الكليه مزهقك وعايز تعمل شيفت وتشوف حاجه تانيه بتحبها انت ؟! 

كل عقليه من دول لها اتجاه محدد وعشان نشرحهم كلهم ف ده هيحتاج بوست فوق البوست ده ف لو انت حابب برضه اننا نشرحهم ف وضح فى الكومنتز تحت واحنا هناخدهم فى يوم العقليتين ونشرحهم ب استفاضه اكتر.. لكن حاليا تعال نقول امور عامه كده عشان نغطى احتياجات الناس اللى خلاص هتتخرج واللى فى رابعه كمان..

1-اوعاك تسال على التوفال والايلتس الا اذا انت فعلا هتسافر بره او مقدم فى منحه .. غير كده مش عايز اسمع لك صوت ولا تقولى توفال وايلتس مفهوم 😅

2- اوعى تفتكر ان الشغل هيجيلك لغاية باب البيت , انسى لو مفيش سعى واجتهاد وتوكل على الله قبل كل شىء يبقى مش هتشوف شغل

3- انسى تانى انك تعمل cv محترم وانت ممعاكش حاجه تحطها فى السى فى بتاعك.. يعنى اللى بيميز الcv بتاعك هو اللى بيوفر لك فرص الشغل .. عشان كده اول حاجه تهتم بيها خصوصا لو انت لسه فى 4 انك تتعامل كتير وتدخل انشطه طلابيه لو لسه لحد دلوقتى مدخلتش ولا اتعاملت مع الناس وتكسب نهارات ولو لقيت فرصة تدريب يبقا عظيم خالص.. 

4- بعد ما اخدت الامور اللى هتحطها فى الcv بتاعك لازم تعمل الcv بقا مينفعش تكون وصلت للى انت فيه ده ولسه معملتش الcv ولا حتى فاهم يعنى ايه cv اصلا ؟!

5- مهم قوى انك تشتغل على اللغة وعلى السوفت اسكيلز (ابحث عن معنى السوفت اسكيلز) لان سوق العمل دى هى من اهم متطلباته ودى اللى مشتركة فى معظم اماكن العمل تقريباً

6- متعتمدش اعتماد كلى على حد من قريبك قالك لما تخلص جامعة هشغلك واسفرك والكلام ده لان وقت ماتكون خريج ابقى قابلنى محدش بيدور غير على مصلحته الا من رحم ربى

7- التقدير مش هينفعك زى ماانت فاكر لان التقدير فى سوق العمل مش كل حاجه , كله بيعتمد على شاطرتك واجتهادك.. الشغل مفرمه

=======================

8- نعيد تانى وتالت موضوع الكورسات النصابه .. مش اى كورس تشوف عليه بروباجندا تجرى تاخده .. متخليش حد يضحك عليك بكلمتين انجليزى ويقولك معتمد ومش معتمد خد اللى يناسبك فى السوق بتاعك متاخدش اى حاجه وخلاص وتقول هحشى السى فى بيها .. السى فى مش بالكم بتاع وده يدخلنا فى رقم 9

===========================

9- بطل تكتب اى هرى فى الcv بتاعك وفصل الcv على الوظيفة اللى انت مقدم فيها مفيش حاجه اسمها السى فى بتاعى تقيل او كبير.. التقل بيكون بمدى احتوائه على حاجات تساعدك فى الوظيفه بلاش حشو الله يكرمك..

======================

10- اتدرب كويس على مهارات المقابلة الشخصية وزاكر نفسك كويس قبل ماتروح اى انترفيو

=========================

11- اتمرمط فى القاهرة شويتين علشان ربنا يكرمك ويرزقك بمنحة او تدريب او شغل كويس لان الحياة مش سهلة زى ماانت فاكر..

==============================

12- زاكر كويس الشركة او المكان او اللى انت رايح تقدم فيه لشغل وواحدة واحدة مش لازم تقدم على 100 شركة فى مرة واحدة علشان تدى لنفسك مساحة تزاكر وتعرف كل حاجه عن الانترفيو وعن الشركة.. ممكن تقدم على شركات كتير بس تاخد بالك توفق بينهم كلهم عشان متخلطش بين شركتين

================================

فى الاخر فيه 3 حاجات مهمه لو مطلعتش بيهم من الجامعة حاول فى اول 6 شهور من بعد التخرج تعملهم لانهم مهمين جدا جدا...

● الانجليزي 

● الكمبيوتر او ال Microsoft office 

● التطوع : او بمعنى اعم انك تتمرمط فى شغل وتفهم يعنى ياه عمل جماعى.. عشان تبقا فاهم السو ق بعد ما تتخرج..

**  خبط زى انت عايز.. لما تلاقي حاجه غلط فى مكان ومنافيه لمبادئك سيبه .. جرب كل حاجة .. متحصرش نفسك فى حاجة .. اول سنه من بعد التخرج لو انت مكنش لك انخراط اوى بالسوق وانت فى الكليه ف هى اسمها سنين التخبيط.. خبط زى ما انت عايز ميهمكش

اخيرا الشغل مش كل حاجه بنصحك وبنصح نفسى انك دايما تتطوروا من نفسك وماتستسلموش لعدم وجود الشغل فى الوقت الحالى وحاول تسأل على الناس دايما وتخلى بالك من علاقاتك وتطور فيها طول الوقت وتساعد الناس.. وتكتسب علاقات جديده تساعدك بعد كده اتعلم وطور من نفسك .. اعرف كل يوم معلومة جديدة... خد اسم الحاجه الغريبه اللى تقرأها وابحث عنها فى اليوتيوب هتلاقى كل حاجه عنها.. دور متنامش .. ساعد الناس تتساعد يتفتحلك ابواب الخير كلها...

استغل دايما وقتك الفاضى انك اما ترتاح ياما تساعد غيرك لان ده هيفرق فى مودك كتير جدا ويساعدك انك تكمل من مكان ما وقفت..

كان نفسى يوم ما دخلت كليه الاقى اللى يجى يكلمنى ب استفاضه كده عن الكليه ويقولى فيها ايه و امشى ازاى .. طبعا فيه كتير ساعدنى ومنهم اخواتى بس مكنش فيه اللى يقدم الاستفاضه دى ويلخص الكليه كده..

اظن بعد الكلام الكتير دا كله .. 

فانت دلوقتى مستعد للجامعه وكمان مستعد لل life after graduation 

بشىء من الطمأنينة .. و شوية شغل كتير

متنساش تعمل Save للمقالة | Mention لكل صحابك | و share عشان اكبر عدد يستفيدوا و يطبقوا الكلام ده | لو عندك اي سؤال سيبه فى الكومنتات واحنا مع بعض .. كنت اتمنى الاقى اللى يقول ده كله ليا وانا داخل الكليه